My English poems translated into Rajasthani by Ravi Purohit
ख्यातनांव कवयित्री, जगचावी उठाळाकार अर आखै चोखळै आपरी नुमेरेलोजी सूँ ठावी ठौड़ बणावण वाळी रजनी छाबड़ा जी री घण चावी अंग्रेजी कविता पोथी Mortgaged री कीं कवितावां रो राजस्थानी उथळो आपरी पारखी नजर है😊
############################
भरी-पूरी किताब
मन रो म्हारै दरपण हुयग्यो
बेमतलब-सी जिंदगाणी रो
थूं जाणै, सबळ अरथ हुयग्यो
पळकां नाचै खुश-खुश मोरड़ा
सपनां रो थूं चंदण हुयग्यो
पंछी चहकै थारै होठां
मन झरणै री तान थूं हुयग्यो
अणबोल नेह रा बोल व्हीयो थूं
पांखड़ल्यां री नींद हुयो
नींदड़ली री पांख धार थूं
कदै जथारथ, सपन हुयो
मन रो म्हारो आफताब थूं
हिवड़ै रो सरताज हुयो
आस-भरोसो-मिलण-बिछोह
अणबण-गीत-गजल-प्रीत थूं
मन रा सगळा भाव थारै सूं
भावां रो थूं सार हुयो
सुर-ताल-लय-गीत साज थूं
मून होठां री बण्यो गाज थूं
थूं ई मांयनै, थूं ई बारै
जिंदगाणी री किताब हुयो !
00
इन्दरधनख
जूण रै आभै
इन्दरधनख-सो
प्रगट्यो थूं
लीलांवतै आकास ज्यूं
पसरयोड़ी थारी प्रीत
तन-मन में भर देवै हूंस
हरियाळी रा बीज मनड़ै
धीज-भरोसी पौध बणै ।
खरै सोनै ज्यूं साचो
थारो नेह
रंग भर रतियाय देवै
औ साव सूनो सूंसावतो जीवण
थारी प्रीत रै
पीळै-चमकीलै तावड़ै
नारंगी सपनां री बुणगट...
थारी संगत में सीखी
प्रेम-नेह री बारखड़ी
अर जाणियो इण लाली रो पसराव
इन्दरधनखी सपनां री रिमझोळ
मन संसार सुणावै हेत री सरगम ।
थारै पछै
रंग हुयग्या सगळा अदीठ
म्हैं ई हुयी रंगहीण-बेरंग
फगत विगत री कळकळ पड़छियां
मारै छौळां दूणै वैग सूं
थारै बिना म्हारी जिंदगी
साव निरजन बस्ती ज्यूं !
00
कांई थूं सुण रैयी है मां !
मां ! थूं केई बार कैवती
बबली, अबोली क्यूं है
कीं तो बोल्या कर
मन दरूजो कदै तो खड़का
काळजै री आगळ कदै तो सबदां रै खोजां खोल ।
अबै म्हैं जागगी मां
थूं ई सुणबा नै त्यार नीं है
भाव-चींत रा जिका बीज
थूं छिड़कगी म्हारै मन-आंगणै,
राख पतियारो ! कौल है म्हारा
इण विध ई बधता रैसी ।
आखै चोखळै
थारी छिब नै
सीधै सबदां भाखूंली
निरमळ नदिया ज्यूं
इण ढाळै ई बैवती रैसी
थारी मन री सीख-धार !
म्हारो अबोलो मून
अबै बोलण ढूक्यो है मां
कांई थूं सुण रैयी है ?
00
Comments
Post a Comment